Giangkon ni Pang.Ferdinand Marcos Jr. nga aduna na siya’y naka-istorya nga pipila ka personalidad nga posibleng mahimong sunod nga lider sa nasud.
Atol sa ASEAN Editors and Economic Opinion Leaders Forum, gipangutana ang Pangulo kung unsang mga kalidad ang angay mabatonan ug suportahan sa katawhan alang sa mosunod nga pangulo sa nasud.
Sumala sa Presidente, aduna na siya’y mga nakaistorya apan dili pa niya kini iendorso karon. Anaa usab kuno’y iyang giistoryahan nga mibalibad sa maong posibilidad.
Matod niya, dili pa kini ang hustong panahon aron hisgutan ang maong isyu. Gibutyag pa sa Pangulo nga angay unahon sa mosunod nga lider ang pagpaayo sa kahimtang sa nasud, dili ang pamulitika.
Kinahanglan, matod pa niya, usa ka nation-builder nga tinguhaong mapauswag ang kahimtang sa Pilipinas ug tinuod nga nahigugma sa nasud.
Dugang pa niya, bisan og daw sentimental o emosyonal paminawon ang maong mga kalidad, mao kini ang gikinahanglan sa mga Pilipino.
Kinahanglan usab nga kabalo ang mosunod nga lider unsaon kini pagbuhat angay nga kabalo maminaw sa katawhan ug adunay igong kahibalo ug kahanas sa pagpili og mga tawo nga makatabang ug makahatag og hustong giya sa pagdumala sa gobyerno.
