DAVAO CITY – Gipahimangnoan sa Davao City Transport and Traffic Management Office kon CTTMO ang mga drayber ug motorista batok sa pag-apil sa usa ka social media page nga sumala pa gipahinungod sa pagsupak sa mga balaod trapiko sa dakbayan.
Gikanayon ni CTTMO head Dionisio Abude nga ma-detect gihapon sa ilang sistema ang mga sakyanan nga dunay running violation.
Migawas ang isyu sa dihang nakakuha og kapin sa 26,000 ka followers ang Facebook group nga gitawag og “LTO Davao City/Dakop Update (Tinabangay Ta)”.
Nag-post ang mga miyembro og mga pasidaan bahin sa posibleng mga lokasyon sa operasyon sa CTTMO sa Davao City aron makalikay sa pagkuha og tiket.
Sumala sa opisyal, laraw nila nga maghimo og countermissions gumikan kay gawas sa mga operasyon sa CTTMO, usa sab sa gikaproblemahan sa buhatan ang mga drayber nga dunay mga violation partikular na sa kalapasan sa gimuntar nga speed limit.
Kasamtangang nagpakatap og 628 ka traffic enforcer ang CTTMO sa tibuok siyudad, labaw sa ubang mga deputized personnel ug sa Highway Patrol Group sa PNP.
via || Bombo LJF
