Giduso karon sa Alyansang Persons with Disability Office kon PDAO ang pagpatukod ug opisina alang sa tanang persons with disability diri sa dakbayan sa Davao.
Sumala pa ni Atty. Rani Leonar, opisyal sa PDAO, niingon nga dili lang kini motubag sa mga kabalaka ug mga hagit nga giatubang sa mga PWD apan gimando usab kini sa balaod, ilawom sa Republic Act No. 7277 o nailhan nga “Magna Carta for Disabled Persons” nga giamendar sa RA No. 10070 o usa ka Act Establishing an Institutional Mechanism to Ensure the Implementation of Programs and Services for Persons with Disabilities” nga nagmando sa lokal nga panggamhanan sa pagtukod ug pagdumala sa ilang kaugalingong PDAO.
Gikanayon sab ni Leonar nga nahisakop ang pagtabang sa mga PWDs dili lamang sa mga dunay orthopedic disability sama sa polio, amputation o pagkabako; ug sa mga naka-wheelchair, kon dili sa mga dunay learning, psychosocial ug intellectual disabilities sama sa dunay down syndrome, amang o deaf-mute, ug autism.
Sa pagkakaron, nasa kapin baytemil na ang mga rehistradong PWDs sa dakbayan sa Davao. Kasamtangang nakighinabi sab sila kang Mayor Sebastian “Baste” Duterte nga suportahan ang pagtukod sa PDAO ug dako ang paglaom sa grupo nga mahimo kini nga division o departamento ubos sa City Mayor’s Office ug gilangkuban sa mga tinudlong empleyadong PWDs gikan sa lain-laing sektor.
VIA || Bombo LJ Florendo
