DAVAO CITY – Dungan sa gilaumang pagdagsa sa mga pasahero atol sa Kalag-kalag sa umaabot nga bulan sa Nobyembre, hugot karon ang panawagan sa Davao City Overland Transport Terminal (DCOTT) ngadto sa mga byahero nga largo na nga muadto sa Ecoland Terminal gumikan wala pa gihapon gitugutan ang mga bus nga magsakay og mga pasahero sa designated bus stops sa tibouk dakbayan sa Davao.
Kahinumduman nga gisuspende ang pagpasakay sa mga pasahero sa bus stops ning dakbayan niadtong bulan lamang sa Mayo human ang serye sa pagpamomba nga nahitabo sa kasikbit nga mga rehiyon. Gikanayon ni Aisa Usop, manager sa DCOTT, nga pangdakpon gayud ang mga bus drivers nga mulapas sa no pick-up policy sa syudad.
Hinoon, giklaro sa opisyal nga ang maong security protocol ang dili na aplikable sa mga lugar nga gawas sa Davao City.
Sa pikas bahin, hugot ang pahimangno sa manager sa maong terminal ngadto sa mga pasahero nga bisan paman dili required ang pagsul-ob og face mask sa bus terminal, pabilin pa gihapon nga striktong ipatuman ang health protocol sa higayon nga sakay na sa bus ang usa ka pasahero.
Text by || Bombo Allianne Ferandos Silao
