Nagpahibalo si Agriculture Secretary Francisco Tiu Laurel Jr., nga mao usab ang Chairperson sa NFA Council, nga pataason sa National Food Authority (NFA) ang presyo sa pagpalit og palay sa tibuok nasod gikan sa ₱17 ngadto sa ₱21 kada kilo sugod sa Septyembre aron matabangan ang mga mag-uuma sa pagsaka sa gasto sa abono ug uban pang produksiyon.
Gipahibalo usab ang temporaryong pagdili sa importasyon sa bugas sa Iloilo gikan sa tunga-tunga sa Septyembre hangtod sa katapusan sa Nobyembre aron mapanalipdan ang presyo sa lokal nga ani panahon sa kinatumyan sa ting-ani.
Matod sa National Food Authority (NFA), ang maong mga lakang makatabang sa pagsaka sa farm-gate price sa palay ug sa pagdugang sa kita sa mga lokal nga mag-uuma.
Ang Iloilo nga nailhan isip rice bowl sa Visayas, nakaproduce og 837,852.21 metric tons nga palay kaniadtong 2025, apan mikunhod og 34 porsiyento ang produksiyon sa bugas ngadto sa 203,934.59 metric tons sa unang tulo ka bulan sa 2026, sumala sa Philippine Statistics Authority (PSA).
Gibutyag usab ni Secretary Laurel ang plano sa pagtukod og duha pa ka dagkong pasilidad sa pagproseso sa humay sa Iloilo, nga gilauman nga magsugod og operasyon sa Oktubre, samtang ang usa ka gamayng processing center sa Dumangas itugyan sa usa ka kooperatiba sa mga mag-uuma.
Nagtukod usab ang NFA og 36 ka modernong rice processing facilities aron mapakunhod ang postharvest losses, mapalambo ang kita sa mga mag-uuma, ug mapalig-on ang food security sa nasod. Katunga sa mga pasilidad gilauman nga maoperahan sa umaabot nga ting-ulan, samtang ang nahibilin mahuman sa dili pa ang sunod nga ting-ani sa ting-init.
Giinagurahan sa NFA niining semanaha ang usa ka ₱355.4 milyon nga rice processing facility sa Iloilo nga makahimo og pagproseso hangtod sa 4,800 ka sako nga 50-kilo nga palay matag adlaw ug adunay mechanical dryers aron makapalit og bag-ong ani nga basa nga palay sa mas maayong presyo.
Gipasabot nga kabahin kini sa vision ug mission ni President Ferdinand Marcos Jr. alang sa usa ka modernisadong sektor sa agrikultura diin ang mga mag-uuma makabaton og desenteng panginabuhi ug ang mga konsumidor makapalit og barato nga pagkaon.
