Nagpadayon nga lig-on ug normal ang operasyon sa Mindanao Grid bisan pa sa magnitude 5.0 nga aftershock nga mitay-og sa kadagatan sakop sa Sarangani, Davao Occidental sayo sa kabuntagon.
Sumala pa sa National Grid Corporation of the Philippines (NGCP), wala’y natalang kadaot sa transmission facilities sa Southwestern Mindanao ug sa mga kasikbit nga lugar nga nakabati sa linog, hinungdan nga nagpabiling lig-on ug luwas ang serbisyo sa transmisyon sa kuryente.
Dugang pa niini, gibutyag sa PHIVOLCS nga tectonic ang gigikanan sa maong linog nga natala duol sa Balut Island ug adunay giladmon nga 10 kilometro.
Kahinumduman nga ang magnitude 5.0 nga paglinog usa lamang ka aftershock sa magnitude 7.8 nga kusog nga linog nga miigo sa maong kadagatan niadtong Hunyo 8.
Sa kasamtangan, gipatin-aw sa PHIVOLCS nga wala sila nagpaabot og dakong kadaot o makadaot nga mga aftershock nga may kalabutan sa maong paglinog.
