DAVAO CITY – Nadungagan pa ang ihap sa mga recreational parks sa dakbayan sa Davao human nga gi-inagurahan ang usa ka pampublikong parke nga nahimutang sa Barangay Los Amigos kagahapong adlawa.
Personal nga gitambungan ni Davao City Mayor Sebastian “Baste” Duterte ang maong aktibidad. Gawas sa mayor, anaa usab ang presensya sa hepe sa City Environment and Natural Resources Office (CENRO) nga si Engr. Marivic Reyes ug pipila ka mga konsehal ug opisyales ning dakbayan.
Muabot sa P26 million ang budget alang sa pagmugna sa Los Amigos Pocket Park diin gikuha kini gikan sa Local Government Support Fund. Gisugdan kini sa pagdevelop niadtong bulan sa Oktubre sa nakalabay nga tuig. Ang nahisgutang parke ang magsilbi nga lugar diin asa mamahimong makapahulay ang mga residente sa Barangay Los Amigos ingon man ang ubang mga indibidwal nga nanimuyo sa kasikbit nga mga lugar.
Daghanang mga amenities ang makit-an sulod sa 5,000 square meters nga pocket park diin gilangkuban kini sa playground, elevated gazebo nga adunay overlooking view, parking lot, bike racks, solar lights, brick pathways, endemic trees ug mga ornamental plants. Abli ang parke alang sa gustong mag-jogging o walking sugod alas 5 hangtud alas 8 sa buntag ug subling mag-abli ala una sa hapon hangtud alas siete sa gabii.
(Photo credit to the owner)
