Natanggong sa mga pantalan sa Davao City ang pipila ka mga pasahero human kalit nga isuspinde ang byahe sa mga barge ug lantsa padulong ug pabalik sa Island Garden City of Samal kagabii, Huwebes, Pebrero 5, 2026.
Nagtapok ang mga pasahero sa Sta. Ana Wharf ug Sasa Wharf samtang naghulat og abiso kung kanus-a mobalik ang normal nga operasyon sa biyahe. Daghan kanila ang napugos nga magpabilin sa pantalan bisan sa kagabhion tungod sa kakulang sa alternatibong sakyanan.
Gipasabot sa mga otoridad nga ang desisyon sa pagsuspinde sa tanan nga byahe gihimo isip lakang sa kaluwasan, ilabi na nga misamot ang pagkabayolente sa panahon tungod sa epekto sa Bagyong Basyang nga nagdala og kusog nga hangin ug balod sa kadagatan.
Apil sa mga naapektuhang ruta ang KM. 11–Villarica Pier, Sasa Barge Wharf–Maewess Babak Wharf, ug Sta. Ana Port padulong sa Talicud Island. Matud pa, temporaryo ang maong pagsuspinde ug magdepende sa kahimtang sa panahon ang pagbalik sa biyahe.
Mipahimangno usab ang mga awtoridad sa publiko nga likayan una ang dili kinahanglan nga pagbiyahe paingon ug gikan sa Samal samtang nagpadayon ang dautang panahon. Giawhag ang mga pasahero nga magpabiling alerto ug maghulat sa opisyal nga anunsyo aron malikayan ang peligro ug kalisod sa dalan ug kadagatan.
