DAVAO CITY – Malipayong nakabalik sa iyang pamilya ang usa ka mananagat gikan Island Garden City of Samal, Davao del Norte human sa tulo ka adlaw nga pagkawala sa kadagatan.
Giila sa Coast Guard Station IGACOS ang maong mananagat nga si Arnel Samargo Torrejano, 38 anyos, taga-Prk 5, Brgy Pangubatan, Kaputian District sa maong syudad.
Nasayran nga tulo ka adlaw natanggong sa kadagatan human naanod sa dagkong balud ug naguba ang gisakyang payaw sa nahisgutan.
Ulahing nasigpatan si Torrejano sa mga mananagat nga taga-Lupon, 5 kilometros ang gilay-on gikan sa baybay sa Talicud Island.
Luwas nga nakabalik sa pampang ang mananagat bandang alas-11:00 sa udto kagahapon, Agosto 31.
Nahatagan sab og atensyong medikal ingon man pinansyal nga hinabang ang mananagat aron makabawi gikan sa maong panghitabo.
via || Bombo LJF
