Mitay-og ang kusog nga magnitude 7.7 nga linog sa kadagatan sa amihanang bahin sa Flores Island, East Nusa Tenggara, Indonesia alas-5:58 sa buntag lokal nga oras niining Sabado, Agosto 15, 2026.
Sumala sa United States Geological Survey o USGS, natala ang linog sa mabaw nga giladmon nga mokabat sa 10 kilometro, diin ang epicenter nahimutang 68 kilometro sa amihanan-kasadpan sa Ende.
Misunod ang pipila ka kusog nga aftershocks, lakip ang magnitude 5.6 ug magnitude 5.9. Gipagawas usab ang tsunami warning alang sa mga dapit sa kabaybayonan sa East Nusa Tenggara nga posibleng maapektuhan sa kusog nga pagbalod tungod sa linog.
Sa kasamtangan, wala pay kumpirmadong ihap sa mga namatay o dakong kadaot sa unang mga taho. Padayon usab nga gimonitor sa mga otoridad ang kahimtang sa maong lugar, ilabina ang posibleng epekto sa sunod-sunod nga aftershocks ug hulga sa tsunami.
