Giduso sa Davao City Health Office (CHO) ang panawagan sa mga kalalakin-an nga Dabawenyo nga nag-edad 50 anyos pataas nga magpa-susi batok sa prostate cancer pinaagi sa libre nga prostate screening sa mga district health centers sa siyudad.
Sumala ni Dr. Rudney James Velasquez, ang Men’s Health Medical Coordinator sa CHO, ang sayo nga pagpasusi importante aron masuta kung aduna bay sintomas o posibilidad sa sakit sa prostate, ilabi na kung adunay history ang pamilya sa maong sakit.
Lakip sa ginahatag karon nga serbisyo sa CHO mao ang digital rectal exam (DRE), usa ka medikal nga paagi aron masusi ang prostate, rectum, ug anus batok sa mga abnormalidad.
Libre kini nga serbisyo ug available sa tanang district health centers sa Davao. Gipasiugda ni Dr. Velasquez nga ang mga lalaki nga adunay family history sa prostate cancer kinahanglan nga magpa-check up sa sayo pa lang kay posible kining mamana sa sunod nga henerasyon.
Gipahinumdom usab sa CHO nga ang kahimsog sa kalalakin-an kinahanglan hatagan og parehas nga importansya sa kahimsog sa kababayen-an aron malikayan ang seryosong balatian sama sa cancer.
