DAVAO CITY – Gibutyag ni Pol. Maj. Ma. Teresita Gaspan, tigpamaba sa Davao City Police Office nga usa sa rason nganong mas taas ang natalang kaso sa pagpanglugos karong tuiga kung itandi sa nakalabay nga 2021 mao ang pagbaton og kaisog sa mga biktima nga itug-an ang ilang kahimtang sa kapulisan. Apan giklaro sa opisyal nga wala kini nagpasabot nga makahatag kini og kabalaka sa katawhan. Nagpasabot lamang matud pa kini nga nagkataas na ang level of awareness sa katawhan ilabi na sa mga rape victims sukad nga nagmugna og mga plataporma ang panggamhanan sama na lamang sa Kean Gabriel Anti-Child Abuse Hotline nga usa ka facebook account diin usa kini ka inisyatibo ni kanhi Mayor “Inday” Sara Duterte diin mamahimong magpadangat gilayon og report ang publiko kung ugaling nakasinati o nakasaksi og child abuse sama na lamang sa pagpanglugos.
