DAVAO CITY – Gihikay na ang kasong frustrated murder batok sa usa ka Elvin 30 anyos nga midunggab sa kustomer sa iyang hinigugma nga si alyas Langging.
Naila ang biktima nga usa ka Renante nga wala mibayad human sa ilang panaghilawas sa usa ka Langging alas 4:00 sa kaadlawon sa Saavedra Street, Barangay Toril Proper, Toril District, ning dakbayan sa Davao human niini madiskobre nga dili diay kini babaye.
Si Chief Inspector Ronald Lao, hepe sa Toril Police Station, nag-tug-an nga ang biktima nga si Renante, 27 anyos, residente sa Purok 7, Upper Dayap, Barangay Sirawan, Toril District wala mibayad sa ilang nasabutan sa usa ka bayot kay wala siya ganahi sa ilang pag-sex.
Nasayran nga nagdahom ang biktima nga babaye ang iyang nakaila, nga gikasabot nga mag-sex, apan sa dihang naghubo na si alyas Langging, dako iyang katingala kay iyang nakita ang kinatawo niini nga nagbitay.
Tungod niini, nanggawas sila sa usa ka inn ug wala mibayad ang biktima hinungdan nga naglalis sila sa bayot nga dali nga mitawag sa iyang boyfriend.
Taud-taod, miabot ang boyfriend sa bayot nga si Elvin, 30, nagpuyo sa Teacher’s Village, Toril, kinsa dunay kauban nga duha ka mga lalaki.
Giingong kalit gidunggab sa suspek ang biktima duha ka higayon sa tiyan ug daling miikyas sakay sa usa ka payung-payong.
Dali sab nga gidala sa Southern Philippines Medical Center ang biktima samtang ang suspek malampusong nadakpan sa kapulisan ug positibong gitudlo sa mga nakasaksi sa krimin.
