DAVAO CITY – Nagkadugo, duna’y mga bukol ug gisi sa baba dihang midangop sa kapolisan sa Sta, Ana PNP ang usa ka baynte anyos nga lalaki nga naila sa pangalan nga Pegian Aurby, alyas Aivan.
Gisumbong niya sa kapolisan ang pagkulata kaniya sa bag-ong hinigugma sa kanhi niyang trato nga si alyas Amida.
Nasayran nga mga alas 2:30 sa kaadlawon dihang ang biktima nakigkita sa iyang ex-girlfriend nga si alyas Amida sa Jacinto Extension, ning dakbayan sa Davao wala damha sa duha nga kalit nga mi-abot ang bag-ong hinigugma sa babaye nga nailang si alyas Turp ug daw gaaso-aso sa grabeng kasuko dihang nakita ang kanhing hinigugma ni Amida.
Gumikan sa naghinobra nga selos gapungasi nga kumo ang gipatugpa niini sa nawong sa biktima.
Didto sa buhatan sa kapolisan gipahimangno-an kini sa mga tinugyanan sa balaod nga magpatambal una ang biktima ug mokuha ug medical certificate ug modangop ngadto sa barangay alang sa posibling husay sa ilang bangi sa bag-ong hinigugma sa iyang kanhi trato.
