Naitala ang kapin sa 1,300 ka waterbirds sa mga nag-unang wetland sa probinsya sa Cagayan atol sa Asian Waterbird Census (AWC) 2026 niadtong Enero 13–14, sumala sa Department of Environment and Natural Resources (DENR) Region 2.
Sakop sa survey ang mga lugar sa Buguey ug Santa Teresita, lakip na ang Pattao Ponds, Minanga Weste Lagoon, ug Bangalao Lake. Ang maong census nagpakita sa ecological richness sa Cagayan wetlands, nga usa ka importante nga puy-anan sa migratory birds gikan sa lain-laing bahin sa Asia.
Pinakadaghan nga species nga naobserbahan mao ang Black-winged Stilt sa Pattao Ponds, Kentish Plover sa Minanga Weste Lagoon, ug Common Snipe sa Bangalao Lake. Naitala usab ang lain pang langgam sama sa Collared Kingfisher, Gray Heron, Little ug Intermediate Egret, Common Greenshank, Striated Heron, Black-headed Gull, ug Common Moorhen.
Matud ni DENR Region 2 Executive Director Ismael Manaligod, ang AWC usa ka hinungdanon nga himan sa pagsubay sa kahimsog sa wetland ecosystems, pagtino sa mga potensyal nga hulga, ug paggiya sa mga lakang sa konserbasyon. Gipasiugda usab niya ang importansya sa kooperasyon sa lokal nga komunidad aron mapadayon ang pagpanalipod sa mga wetland ug biodiversity niini.
Ang malampusong census nagpamatuod sa pagka-resilient sa kinaiyahan ug nagpahinumdom sa responsibilidad sa mga residente sa probinsya sa pag-amping sa ilang natural nga kahinguhaan alang sa umaabot nga henerasyon.
