DAVAO CITY – Naglaom si City Tourism Office (CTO) head Generose Tecson nga makab-ot nila ang kapin 200,000 ka ihap sa mga turista nga mobisita dinhi sa dakbayan karong bulan sa Agosto o atol sa tibuok bulan nga kasaulogan sa Kadayawan sa Davao.
Sumala kang Tecson nga sagad dagsa gayud ang mga langyaw ug lokal nga turista sa nahisgutan nga panahon ilabi na sa mga highlights sa Kadayawan nga Indak-indak sa kadalanan nga ipahigayon sa Agosto 17 ug pamulak sa Kadayawan sa Agosto 18.
Karon pa lang, gi-andam na sab sa ahensiya ang Tribal Village nga kalakip karon sa mga dagsaon sa mga turista diin makita ang nagkadaiyang panimalay ug pagkaon sa mga lumad sa siyudad.
Positibo sab ang opisyal nga makab-ot sa dakbayan ang kinatibuk-ang 3 milyones ka nga tourist arrivals sulod karong tuiga.
Makatabang sab sumala pa sa pagsaka sa ihap sa mga turista ang ipahigayon nga mga convention dinhi sa dakbayan.
