NATIONALGihagit ni Iloilo Representative Julienne Baronda ang Philippine Drug Enforcement Agency ug Philippine National Police nga magpagawas ug datos o bisan unsang kamatuoran nga mosuporta sa nahimong pamahayag ni kanhi Pangulong Rodrigo Roa Duterte nga ang Iloilo City mao ang pinaka-shabulized nga syudad sa Pilipinas.
Gihimo sa magbabalaod ang panawagan sa gihimong quad committee hearing sa San Fernando, Pampanga.
Kung kahinumduman, gipahayag kaniadto ni kanhi PRRD sa unang bahin sa iyahang war on drugs nga ang Iloilo City mao ang bedrock sa iligal nga droga.
Gitumbok usab sa kanhi Pangulo ang kaniadtong mayor sa syudad nga si Mayor Jed Mabilog isip drug protector ug usa usab kuno sa narco politician.
Hugot usab kining gipanghimakak ni Mabilog ug bisan paman niini, nagpadayon ang pagpanghulga sa iyaha ni Duterte nga nahimong hinungdan nga mibiya kini sa nasud gumikan sa hulga sa iyang kinabuhi.
Apan giklaro sa PDEA-Region VI niadtong 2017 nga wala nahilakip si Mabilog sa listahan sa mga protektor sa iligal nga droga.
Punto usab sa magbabalaod, klaro nga ang mga akusasyon ni Duterte mao ang pagsimang lamang sa attention gumikan sa pagkalambigit sa mga nahisgutan sa illegal drug trade sa nasud.
