Gipahayag sa Integrated Bar of the Philippines (IBP) nga legal ug balido ang sesyon sa Senado nga gihimo niadtong Hunyo 3 bisan pa sa mga pangutana kabahin sa quorum atol sa maong sesyon.
Sa pahayag sa organisasyon, giingon nga ang ilang posisyon gibase sa desisyon sa Korte Suprema sa kasong Avelino v. Cuenco niadtong 1949. Tungod niini, giila sa IBP nga opisyal ug adunay bisa ang tanang aksyon, resolusyon ug desisyon nga gihimo sa maong sesyon.
Lakip sa mga gihimong aksyon sa Senado mao ang pagpili kang Sen. Sherwin Gatchalian isip Senate President Pro Tempore ug ang pagtalaga sa mga bag-ong chairpersons ug miyembro sa nagkadaiyang komite.
Matud sa IBP, igo na ang presensya sa 12 ka senador aron makabuo og quorum tungod kay adunay duha ka senador nga dili maihap isip available sa pagtuman sa ilang katungdanan. Lakip niini si Sen. Jinggoy Estrada nga anaa sa kustodiya sa kapulisan may kalabotan sa kasong plunder ug si Sen. Ronald “Bato” dela Rosa nga wala pa matino ang nahimutangan.
Subay niini, 22 lamang ang giila nga available nga miyembro sa Senado ug ang presensya sa 12 ka senador igo na aron makabuo sa constitutional majority nga gikinahanglan alang sa quorum.
Nahinumduman nga mitumaw ang isyu human wala motambong sa plenary session ang majority bloc nga gipangulohan ni Senate President Alan Peter Cayetano. Apan mitambong si Sen. Francis “Chiz” Escudero ug miuban sa 11 ka miyembro sa minority bloc nga maoy nakakumpleto sa gikinahanglang ihap alang sa quorum.
