DAVAO CITY – Patay ang usa ka Junito Batulat, hamtong ang pangidaron, taga Purok 4, Sitio Tandawan, Brgy. Magtuod, Talomo District ning dakbayan sa Davao, pasado alas-5 karong hapon.
Sa eksklusibong pagpanubay sa Bombo Radyo Davao sa crime scene, gipusil kini mismo sa iyahang ig-agaw nga nailang si Antig Espinosa, hamtong ug usa ka negosyante.
Nasayran nga gikan nanabong ang suspek ug ang biktima apan duna sumala pay nakalalis ang suspek sa laing ig-agaw niini ug gibadlong sa biktima, ug didto na nagsugod ang pagpamusil gamit ang .45 nga armas.
Naka angkon ug ubay ubay nga igo ang biktima sa wala nga dughan lapos sa iyang likod nga bahin, hinungdan sa iyang hinanaling kamatayon.
Sa karon, padayon pa nga gipangita ang suspek nga dali ra usab nga misibat sakay sa iyang motorsiklo human sa maong insidente. Samtang padayon pa usab ang gihimong imbestigasyon sa kapulisan.
Ang patay nga lawas sa biktima anaa na sa Angel Funeral Homes sa may dalang Torres ning syudad.
