Gipadad-an na og pormal nga sulat si kanhing Pangulong Rodrigo Duterte, aron patambungon sa pagdungog sa Kamara karung umalabot nga adlawng Martes, petsa 22 ning bulana, diin magsugod kini sa 9:30 ang takna sa buntag.
Lakip sa hisgutan ang extra judicial killings nga natigayon kaniadtong anaa pa kini sa posisyon isip pangulo sa nasud.
Ang maong sulat dunay pirma ni Rep. Robert Ace S. Barbers, ang Chairperson sa Committee on Dangerous Drugs. Kahinumdumang una nang gihagit ang Kamara sa kanhi pangulo nga andam kining mutambong sa maong ipahigayong pagdungog, aron tubagon ang mga gikalambigita nga mga isyo ngadto kaniya ug dili na matud pa kinahanglan nga mangdamay pa ang taga Kongreso og laing tawo nga kuhaon nila isip witness o resource person aron mutestimonya labot sa maduguong war on drugs.
Hingpit sab niini gipanghimakak sa kanhing pangulo nga dunay reward system sa pagimplementa war-on-drugs niadtong panahon sa iyahang administrasyon.
Gikanayon niini nga matag adunay malampuson nga accomplishment ang mga kapulisan, igo lamang matud pa niini ginapakaon ug ginahatagan og ilimnong makahubog. Dili sumala pa modawat ang kapulisanog kwarta tungod maulaw sumala pa ang mga nalambigit nga pangalan, sukwahi sa alegasyon ni Ret. P/Col. Royina Garma nga adunay cash reward ang mga kapulisan sa war on drugs sa nakalabay nga administrasyon ug gigamit ang Davao model alang sa pagimplementa sa maong kampanya sa kinatibuk-ang nasud.
Anaa sumala pa sa P20,000 hangtod sa P1-milyon ang mga kwartang ihatag ni Duterte sa mga kapulisan nga malampuson nga accomplishment sa war on drugs.
Gani, nagduso na matud pa si Sen. Bong Go og resolusyon aron nga magpahigayon og parallel investigation sa war on drugs diin nagtumong matud pa kini nga mahibal-an ang posibleng balaod nga mutubag sa problema sa droga sa nasud pinaagi matud pa sa holistikong pamaagi.
Samtang sa pikas bahin, gibutyag usab ni PCapt. Hazel Tuazon ang tigpamaba sa Davao City Police Office nga abli sumala pa ang ilahang buhatan alang sa bisan unsang ipahigayong imbestigasyon sa senado ug kamara.
