DAVAO CITY – Anaa sa P15 million pesos ang ayuda nga ipanghatag nga financial assistance ngadto sa mga pamilyang nasunugan sa Barangay 21-C ug 22-C, Piapi Boulevard, Davao City.
Sumala ni Julie Dayaday, administrative officer sa CSWDO, tig-₱20,000 ang madawat sa matag tag-iya sa gitahong totally damaged.
Samtang ₱15,000 alang sa panimalay nga partially damaged. Naggahin usab ang lokal nga panggamhanan og tabang pinansiyal alang sa mga sharers, caretakers ug mga renters nga anaa sa ₱10,000.
Samtang, ₱5,000 sab ang madawat sa mga borders nga nasunugan. Gikatakda nga ipahigayon ang pay-out sa mga ayuda karong ugmang adlawa, Lunes, Marso 13, sa Barangay 23.
Subay sa gipahigayon nga final validation sa Barangay 21-C, 349 ka mga panimalay ang natalang totally damaged, 6 ang partially damage, ug 3 ang slightly damaged.
Samtang 159 usab ang natalang totally damaged sa Barangay 22-C, 18 ang partially damaged ug 7 ang slightly damaged.
Gikanayon usab sa opisyal nga duna pa gihapoy mga pamilyang biktima sa sunog ang nagtiner pa sa mga evacuation centers ning kasamtangan.
via || Bombo LJF
