Naglunsad pag-usab og airstrikes batok sa Iran ang Estados Unidos sa ikaupat ug sunod-sunod nga adlaw sa pag-atake niini.
Gikumpirma kini sa U.S. Central Command diin gitarget sa Amerika ang mga pasilidad nga giingong gigamit sa Iran sa pag-atake sa mga commercial boat nga moagi sa Strait of Hormuz.
Kauban niini, gibalik usab sa Estados Unidos ang naval blockade aron pugngan ang pagsulod ug paggawas sa mga barko sa mga pantalan sa Iran.
Matud sa usa ka taas nga opisyal sa Iran, nilapas kini sa unang kasabutan sa duha ka nasod bahin sa temporaryong ceasefire aron hatagan og higayon ang panaghisgot alang sa kalinaw sa rehiyon.
Gikanayon usab nga natandog sa airstrikes sa Amerika ang pipila ka mga lugar duol sa Strait of Hormuz lakip ang Qeshm Island, Bushehr, ug mga dapit duol sa utlanan sa Iraq ug Kuwait.
Mibalos ang Iran pinaagi sa pag-atake sa mga barko sa Amerika sa Strait of Hormuz diin duha ka tripulante ang namatay. Usa usab ka Norwegian oil tanker ang nadaot human maigo sa drone attack duol sa Oman.
Gipahibalo sa Kuwait nga lakip sila sa naigo sa missile ug drone attack gikan sa Iran ang usa sa ilang mga barkong panggubat, nga nakaangol sa upat ka tripulante.
Samtang nagkagrabe ang tensyon, gipahibalo ni U.S. President Donald Trump nga dili na niya ipadayon ang plano nga toll fee alang sa mga barkong moagi sa Strait of Hormuz.
Sumala pa niini, pulihan kini sa mga kasabutan sa negosyo ug pamuhunan gikan sa mga kaalyadong nasod sa Amerika sa Gulf region.
Nagpasidaan usab si Israeli Prime Minister Benjamin Netanyahu nga motubag dayon sila kung maglunsad og pag-atake ang Iran batok sa Israel.
