DAVAO CITY- Nakigkoordinar na ang Department of Public Works and Highways (DPWH-XI) mahitungod sa ilang mga proyekto ngadto sa mga utility companies sama sa Davao City Water District (DCWD), Davao Light and Power Company (DLPC) ug telecommunication companies (telcos).
Sumala pa ni Dean Ortiz, tigpamaba sa DPWH XI, nga tumong niini nga malikayan ang damyos sa ilang mga linya atol sa implementasyon sa pipila ka mga proyekto diin gibutyag niini nga sa higayon nga kaluton na ang yuta alang sa pagpalambo sa drainage, adunay dako nga posibilidad nga maigo sab ang mga assets sa mga nahisgutang kompanya.
Samtang sa kaso sa Davao City Water District (DCWD) sa higayon nga magkalot na, kinahanglan anaa permi ilahang presensya gumikan sila ang mogiya sa mga backhoe operators sa mga contractors kung asa luwas ug unsaon pagdiskarte nga dili maapektuhan ang ilahang mga tubo.
Giklaro ni Ortiz nga kung aduna may mga mahitabong insidente o maapektohang assets, andam silang mutabang sa pag-ayo niini.
