Nakasakop ang Davao City Police Office o DCPO og napulo ka indibidwal, lakip ang usa ka menor de edad nga giluwas, tungod sa giingong pagpanulis og PLDT wires sa Barangay Agdao Proper, Davao City niadtong Oktubre 28, 2026.
Namatikdan sa mga pulis nga nagpapatrolya ang mga indibidwal samtang giingong gibungkag ang mga kable nga walay gikinahanglang work permit. Dihadiha silang gisanta sa mga niresponde nga kapulisan.
Narekober sa operasyon ang tulo ka sakyanan, mga gamit ug kagamitan sa pagputol, lakip ang mga linukot nga PLDT cables nga gituohang gikan sa maong lugar.
Gipasiugda sa DCPO nga dili nila tugotan ang bisan unsang kalihokan nga makadaot sa mga pasilidad ug serbisyo publiko sa siyudad. Gihangyo usab ang publiko nga ipahibalo sa kapulisan ang mga kadudahang kalihokan aron malikayan ang susamang insidente.
Wala pa matino sa gipagawas nga report ang pagkatawo sa mga nadakpan ug ang tukmang kantidad sa mga kable nga narekober.











