Nagpaklaro ang Davao City Police Office (DCPO) nga nagpabilin silang usa ka ‘apolitical’ ug ‘non-partisan’ nga organisasyon diin ang ilahang pagpakabana ang alang sa kahapsay ug kasiguruduhan sa katawhan.
Sa gipaguwang pamahayag sa DCPO, nakadawat sila og taho labot sa dili otorisadong pagkuyanap sa usa ka internal memorandum ngadto sa social media.
Sumala pa sa maong post nga nagpaguwa og kamanduan ang Police Regional Office XI (PRO XI) nga gikinahanglan magsuot og pula nga sanina ang mga pulis nga mihatag og dugang seguridad alang sa Alyansa Para sa Bagong Pilipinas Campaign Rally nga gipahigayon sa Carmen, Davao del Norte kagahapon sa hapon.
Matud pa nga ang maong memorandum ang tubag sa hangyo sa PRO XI nga sila ang magpadala og 55 ka PNP personnel gikan sa DCPO isip dugang pwersa sa Presidential Security Command (PSG) alang usab sa inner security.
Sumala pa sa kapulisan nga ang maong deplyment ang usa ka standard nga lakang sa seguridad og nagtinguha lamang sa pagpanalipod sa Presidente sa lugar sa maong aktibidad ug sa katawhan.
Mihangyo usab ang otoridad ngadto sa katawhan nga dili magpakaylap og maling impormasyon o maghimo og spekulasyon kabahin sa susama nga butang.
