Gipataas na sa Tropical Storm ang kusog sa bagyong Kiyapo sa Tropical Cyclone Intensity Scale sa PAGASA, nga padayong magdala og pag-ulan sa daghang bahin sa nasod karong Biyernes, Hulyo 24.Matud sa pinakabag-o nga weather bulletin sa PAGASA alas-3:00 sa kaadlawon, namatikdan ang sentro sa Tropical Storm Kiyapo sa gilay-on nga 355 kilometro sidlakan sa Aparri, Cagayan.
Dala sa bagyo ang kusog sa hangin nga moabot og 65 kilometro matag oras duol sa sentro ug pagbugso nga moabot og 80 kilometro matag oras. Naglihok kini paingon sa kasadpang amihanan-kasadpan sa gikusgong 30 kilometro matag oras. Gawas sa epekto sa bagyo, nakaapekto usab ang Habagat ilabi na sa Visayas, Southern Luzon, ug pipila ka bahin sa Mindanao.Gipasidan-an sa PAGASA ang publiko batok sa posibleng pagbaha ug pag landslide sa yuta tungod sa kusog hangtod grabeng pag-ulan, lakip na ang hulga sa kusog nga hangin sa mga apektadong lugar.
Sumala sa forecast track, posibleng motugpa ang bagyo sa Babuyan Islands karong udto ug gilauman nga mogawas sa Philippine Area of Responsibility karong gabii. Nagpabilin usab ang Tropical Cyclone Wind Signal No. 1 sa pipila ka lugar sama sa Batanes, Cagayan lakip ang Babuyan Islands, Isabela, Nueva Vizcaya, Quirino, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, ug pipila ka bahin sa Aurora.
Samtang, magpadayon ang madag-umon nga kalangitan uban ang panagsang pag-ulan ug pagkidlat-pagpanalugdog sa Metro Manila, CALABARZON, ubang bahin sa Central Luzon, MIMAROPA, ug Pangasinan. Gipahimangnoan ang mga residente sa maong mga lugar nga magbantay batok sa posibleng pagbaha ug landslide tungod sa kasarangan hangtod kusog nga pag-ulan.
