-- ADVERTISEMENT --

Miabot na sa 65.42 porsyento ang pisikal nga pag-uswag sa Samal Island-Davao City Connector o Samal Bridge, base sa kahimtang sa proyekto niadtong Nobyembre 13, 2026.

Padayon ang pagtukod sa 4.76-kilometros nga tulay ibabaw sa Pakiputan Strait, diin makita na ang paghulma sa concrete deck, samtang nagpadayon usab ang trabaho sa mga marine pier, main pylon ug mga estruktura sa duha ka tumoy niini.

Misunod kini sa pag-apruba ni Pangulong Ferdinand Marcos Jr. sa restructuring sa proyekto atol sa Nobyembre 11 nga miting sa Economy and Development Council, diin misaka ang kinatibuk-ang gasto gikan sa P23.04 bilyon ngadto sa P26.78 bilyon, o dugang nga P3.74 bilyon.

Tungod niini, gipalugway usab ang panahon sa pagpatuman ug gibalhin ang target completion sa Nobyembre 30, 2029, gikan sa orihinal nga Nobyembre 11, 2026.

Giklaro usab nga dili tanan nga pondo sa proyekto gikan sa China, kay P17.39 bilyon ang concessional loan gikan sa nasud, samtang misaka sa P9.39 bilyon ang counterpart funding sa gobyerno sa Pilipinas.

-- ADVERTISEMENT --

Sa dihang mahuman, ang upat ka lane ug walay toll nga tulay magkonektar sa R. Castillo-Daang Maharlika sa Davao City ngadto sa Samal Circumferential Road. Gilauman nga mapamubo niini ngadto sa lima ka minutos ang biyahe tali sa Davao City ug Samal Island, gikan sa kasamtangang 30 hangtod 50 minutos pinaagi sa ferry.