-- ADVERTISEMENT --

Miduaw sa haya sa kanhing PBA star nga si Peter June “PJ” Simon ang pipila ka higala, kanhing kauban sa team ug mga personalidad sa basketball sa Davao City niadtong Dominggo, Nobyembre 22.

Lakip sa mibisita si Senador Christopher “Bong” Go, nga kinugos ni Simon sa kasal, aron personal nga ipaabot ang iyang pakig-ambit sa kasubo sa pamilya.

Miabot usab ang mga kanhing kauban ni Simon sa Purefoods nga sila si James Yap, Marc Pingris, Paul Artadi, Kerby Raymundo ug Rico Maierhofer, lakip ang ilang kanhing coach nga si Ryan Gregorio ug kanhing Rain or Shine player nga si Ryan Arana.

Sa iyang mensahe, nahinumdom si Yap sa ilang dugay nga panaghigalaay ug sa mga higayon nga ilang gipaambit sulod ug gawas sa basketball court.

Samtang, nagpadala usab og bulak isip pakig-ambit sa kasubo ang pipila ka personalidad, lakip si Bise Presidente Sara Duterte, Davao City Vice Mayor Rigo Duterte ug Second District Representative Omar Duterte.

-- ADVERTISEMENT --

Namatay si Simon sa edad nga 46 niadtong Nobyembre 20 human giatake sa medical emergency atol sa usa ka exhibition basketball game sa Davao City.