Nagpadayon ang search and rescue operations sa usa ka pabrika sa kendi sa Banten, Indonesia, human misilaob ang sunog niadtong Sabado sa gabii.
Sumala sa kapulisan, miabot na sa 24 ka body bags ang narekober gikan sa lugar, samtang gibana-bana nga 30 ka tawo ang wala pa makit-i. Gibanabana nga 300 ka empleyado ang naa sulod sa pabrika sa dihang nahitabo ang sunog.
Tungod sa kakusog sa kalayo, dili na mailhan ang mga lawas sa mga biktima, hinungdan nga kinahanglan pa silang ipaagi sa DNA testing aron matino ang ilang mga pagkatawo.
Gikatakdang ipadayon ang operasyon sa Lunes sa buntag, apan nakababag niini ang peligro nga mahimong maguba ug mahugno ang pipila ka bahin sa nasunog nga bilding.
Nangolekta na usab ang mga otoridad og DNA samples gikan sa mga paryente sa mga nawawalang trabahante. Gilauman nga molungtad og duha hangtod tulo ka semana ang proseso sa pag-ila sa mga biktima.
Sa laing bahin, nangayo og pasaylo ug nagpahayag og pakikiramay si Steven Wijaya, chief executive officer sa kompanyang tag-iya sa pabrika, ngadto sa mga empleyado ug pamilya nga naapektuhan sa trahedya.
Padayon pang giimbestigahan sa mga otoridad ang hinungdan sa sunog.











