Gipatuman sa Iran ang rotational brownout sa tibuok nasud sugod niadtong Domingo, Nobyembre 22, tungod sa kakulang sa suplay sa enerhiya ug kadaot sa mga importanteng imprastraktura sa kuryente taliwala sa nagpadayong tensiyon sa Middle East.
Sumala kang Mohammad Allahdad, opisyal sa national electricity company sa Iran, napugos ang sektor sa elektrisidad nga limitahan ang konsumo sa kuryente tungod sa ubos nga suplay sa gasolina.
Gilauman nga molungtad og duha ka oras ang matag brownout ug ipatuman kini matag duha ka adlaw, depende sa lugar o rehiyon.
Gipasabot usab ni Iranian President Masoud Pezeshkian nga nakapasamot sa sitwasyon ang pag-atake sa imprastraktura sa natural gas sa nasud, hinungdan nga gilauman ang dugang kalisod sa suplay sa enerhiya panahon sa tingtugnaw.
Bisan adunahan sa reserba sa lana ug natural gas ang Iran, dugay na kining nag-atubang sa problema sa pagsiguro sa igong suplay sa enerhiya aron matubag ang panginahanglan sa populasyon.
Padayon usab ang tensiyon sa Middle East, nga nalambigit sa kadaot sa imprastraktura sa enerhiya sa nasud.











