-- ADVERTISEMENT --

Gipahimangnoan ang mga residente sa Davao City nga mag-amping batok sa posibleng epekto sa taas nga heat index, human mitala og 40 degrees Celsius ang computed heat index sa siyudad niadtong Domingo, Nobyembre 22.

Base sa monitoring sa PAGASA Mindanao Regional Services Division nga giisyu alas 5:00 sa hapon, gitagna nga moabot sa 39°C ang heat index sa Davao City karong Lunes, Nobyembre 23, ug mosaka pag-usab sa 40°C sa Martes, Nobyembre 24.

Sa talaan sa ahensya, miabot usab sa 40°C ang heat index niadtong Nobyembre 21, human mitala og 34°C sa Nobyembre 18, 39°C sa Nobyembre 19 ug 35°C sa Nobyembre 20.

Ang maong lebel nahisakop sa Extreme Caution category nga adunay 33 ngadto sa 41°C. Gipasabot sa PAGASA nga posible ang heat cramps ug heat exhaustion, samtang ang padayon nga kalihokan ilawom sa kainit mahimong mosangpot sa heat stroke.

Giawhag ang publiko nga likayan ang dugay nga pagbabad sa adlaw, limitahan ang mga kalihokan sa gawas kon init kaayo, ug siguruhong makainom og igo nga tubig aron malikayan ang sakit nga may kalabotan sa kainit.

-- ADVERTISEMENT --