-- ADVERTISEMENT --

Nagplano ang usa ka kompanyang Intsik nga magpatukod og mga windmill sa kadagatan sa Pilipinas nga gidesinyo aron makalahutay sa kusog nga mga bagyo, isip lakang sa pagpalig-on sa suplay sa kuryente sa nasud. Gihisgotan ni Pangulong Ferdinand Marcos Jr. ang maong proyekto uban sa mga opisyal sa Ming Yang Smart Energy Group sa Shenzhen, China niadtong Biyernes, atol sa ika-33 nga APEC Economic Leaders’ Meeting.

Sumala sa kompanya, adunay espesyal nga teknolohiya ang ilang mga wind turbine nga gidesinyo aron makasugakod sa kusog sa mga super typhoon nga molapas sa Category 17. Mipirma usab ang duha ka panig sa kasabotan alang sa panagtambayayong sa pagpalambo sa mga proyekto sa offshore wind energy o paghimo og kuryente gikan sa hangin sa kadagatan sa Pilipinas.

Lakip usab sa plano sa kompanya ang pagtukod og sentro sa nasud alang sa pagmentinar ug pag-ayo sa mga windmill aron mas mapadali ang paghatag og serbisyo ug masiguro ang hapsay nga operasyon sa mga pasilidad.

Gilauman nga makatabang ang maong proyekto sa pagpalapad sa paggamit sa limpyo nga enerhiya ug pagpalig-on sa kasaligan nga suplay sa kuryente sa Pilipinas, ilabina panahon sa kusog nga mga bagyo.