-- ADVERTISEMENT --

Nagkauyon si Pangulong Ferdinand Marcos Jr. ug Japanese Prime Minister Sanae Takaichi sa pagpalapad pa sa kooperasyon tali sa Pilipinas ug Japan sa nagkadaiyang natad, human sa ilang panagtagbo sa Maynila.

Atol sa ilang panagpulong, gihisgutan sa duha ka lider ang nagkadaiyang isyung may kalabotan sa rehiyon ug ang pagpalig-on sa relasyon sa ilang tagsa-tagsa ka nasud, ilabina sa natad sa seguridad, enerhiya ug ekonomiya.

Sumala kang Takaichi, tumong sa Japan nga mas palig-onon pa ang panag-alayon sa duha ka nasud isip Comprehensive Strategic Partners, lakip na ang pagpalapad sa ilang panagtinabangay alang sa kalinaw ug kalig-on sa rehiyon.

Gipasiugda usab sa maong panagtagbo ang kamahinungdanon sa lig-on nga relasyon tali sa Pilipinas ug Japan, ilabina sa pag-atubang sa mga hagit sa rehiyon ug sa pagpalambo sa kauswagan sa duha ka nasud.

Dugang pa, mitambong usab si Takaichi sa ASEAN Gala Dinner nga gipangunahan ni Pangulong Marcos, diin nakig-uban kaniya ang ubang mga lider sa mga nasud sa ASEAN ug mga representante sa nagkadaiyang internasyonal nga organisasyon.

-- ADVERTISEMENT --

Nagpakita ang maong panagtagbo sa padayon nga paningkamot sa Pilipinas ug Japan nga palig-onon ang ilang estratehikong panag-alayon ug pagpalapad sa mga natad nga mahimong tinubdan sa kalinaw, seguridad ug kalamboan sa rehiyon.