Gisusi na sa San Pedro College (SPC) ang mga pormal nga reklamo nga may kalabotan sa giingong sexual harassment ug dili maayong pagtagad sa pipila ka babayeng estudyante sulod sa maong institusyon.
Gikumpirma sa Office of Student Affairs sa SPC pinaagi sa gipagawas nga pahayag nga nadawat na nila ang mga incident report nga may kalabotan sa maong mga sumbong ug gipailalom na kini sa imbestigasyon sa Committee on Decorum and Investigation ubos sa Safe Spaces Act.
Gipasiugda sa administrasyon sa eskwelahan nga dili nila konsintihon ang bisan unsang matang sa pagpanghasi o binuhatan nga makalapas sa dignidad ug makahulga sa kaluwasan sa mga estudyante.
Gipasalig usab sa SPC nga pagahimuon ang imbestigasyon sa patas ug kompidensiyal nga paagi, lakip ang hustong pagdumala sa mga report ug impormasyon sa tanang nalambigit aron mapreserbar ang ilang katungod samtang nagpadayon ang proseso.
Giawhag usab sa eskwelahan ang publiko nga likayan ang pagpakaylap sa mga ngalan ug personal nga impormasyon sa mga nalambigit samtang wala pa mahuman ang imbestigasyon. Gidasig ang mga estudyante ug ang mga adunay dugang impormasyon nga moduol sa Office of Student Affairs o mogamit sa opisyal nga reporting channels sa kolehiyo aron makatabang sa pag-establisar sa mga kamatuoran ug paghatag og hustong aksyon sa mga reklamo.











