Nagpagawas og 600 ka mga piniriso nga nalambigit sa armadong panagbangi sa Yemen ang Houthi rebels sa Sanaa kaniadtong Nobyembre 15, 2026, nga gikonsiderar isip kinadak-ang higayon nga unilateral release sukad nagsugod ang gubat sa nasud kaniadtong 2014.
Matod ni Abdul-Qader al-Murtada, opisyal sa Houthi National Committee for Prisoners’ Affairs, mao kini ang kinadak-ang ihap sa mga prisoner of war nga ilang gipagawas sa maong 12 ka tuig nga panagbangi.
Gikumpirma usab sa International Committee of the Red Cross (ICRC) nga kadaghanan sa mga na release mga miyembro sa pwersa sa gobyerno sa Yemen nga nadakpan atol sa panagsangka.
Gitabangan sa ICRC ang mga gipagawas nga binilanggo pinaagi sa paghatod kanila, pagpahigayon og medikal nga eksaminasyon ug paghatag og gikinahanglang tabang human sa ilang pagkapriso.
Sa wala pa ang ilang pagpagawas, gipahigayon sa mga delegado sa Red Cross ang pribadong interbyu sa matag piniriso aron mapamatud-an ang ilang identidad ug masiguro nga boluntaryo ang ilang pagpauli.
Gihulagway ni Al-Murtada ang maong lakang isip unilateral humanitarian initiative, samtang nagpahayag usab siya og kabalaka sa kalangan sa mas lapad nga negosasyon alang sa pagbayloay sa mga binilanggo tali sa nagkontrang kampo.
Bisan pa sa maong pagpagawas, nagpadayon gihapon ang panagbangi sa Yemen tali sa Houthi rebels ug sa pwersa nga nagsuporta sa giila sa internasyonal nga gobyerno sa nasud.











