-- ADVERTISEMENT --

Gipakusgan sa Iran ang hulga sa seguridad sa Middle East human makarekord og duha ka pagsulay sa pag-atake gamit ang mga drone batok sa Bahrain sulod sa miaging mga adlaw, samtang nagpabiling walay kasabotan ang Tehran ug Washington sa pagtapos sa siyam ka bulan nga panagbangi sa rehiyon.

Gikumpirma sa Bahrain Defense Force nga ilang na-intercept ang pipila ka Iranian drones kaniadtong Dominggo, Nobyembre 15,2026 human sa susamang insidente niadtong Biyernes.

Tungod niini, giawhag sa US Embassy sa Bahrain ang mga Amerikano nga magmatngon tungod sa nagkadakong hulga sa mga pag-atake sa Iran ug sa mga kaalyado niini, lakip ang posibleng pagkansela sa mga biyahe ug pagsira sa airspace.

Samtang, gipahimangnoan ni Iranian Foreign Ministry spokesperson Esmaeil Baghaei ang mga nasud sa Gulf nga wala nagka uyon sa nangaging panagbangi, human gisugyot sa Gulf Cooperation Council (GCC) nga kinahanglan mobayad og kompensasyon ang Iran tungod sa mga pag-atake niini sa ilang mga teritoryo.

Dugang pa niini, nagpadayon ang tensiyon sa Strait of Hormuz tungod sa mga gikatahong pag-atake sa mga barkong pangkargamento ug mga tanker, nga dakong agianan sa pag-eksport sa lana ug gas sa rehiyon.

-- ADVERTISEMENT --

Sa laing bahin, gipadayon ni US President Donald Trump ang estratehiya sa pagpit-os sa ekonomiya sa Iran pinaagi sa US blockade ug mga silot, samtang wala siya magpakita og dinaliang interes sa pagpadayon sa negosasyon.

Gipangayo sa Iran ang pagtapos sa US blockade, hinay-hinay nga pagtangtang sa internasyonal nga mga silot ug pagpagawas sa binilyong dolyar nga frozen assets isip kondisyon sa pagbalik sa negosasyon.

Samtang nagpadayon ang tensiyon, nag-atubang usab ang Iran og kakulang sa suplay sa gasolina ug pagkunhod sa bili sa ilang kuwarta, samtang nagpabilin ang hulga sa mas lapad nga panagbangi sa Middle East.