-- ADVERTISEMENT --

Malampusong gibalik sa natural nga puy-anan sa kadagatan sa San Fabian ang usa ka babayeng rough-toothed dolphin nga ginganlag Novy kagahapong adlawa, Nobyembre 15, 2026, alas 12:45 sa udto human kini maluwas ug masusi sa mga beterinaryo.

Una kining gitugyan sa Bureau of Fisheries and Aquatic Resources – National Fisheries Development Center (BFAR-NFDC) sa Dagupan City niadtong Nobyembre 14, human kini makit-an sa mga lokal nga mangingisda sa San Fabian, Pangasinan.

Sumala sa BFAR Region 1, gipailalom si Novy sa medical examination ni Dr. Noel Difuntorum ug nakumpirmang himsog ug maayo na ang kahimtang niini, hinungdan nga wala na kinahanglana ang dugay nga pag-atiman sa pasilidad.

Ang rough-toothed dolphin o Steno bredanensis usa ka matang sa dolphin nga kasagarang nagpuyo sa lawom ug tropikal nga kadagatan. Ginganlan kini sa ingon tungod sa gagmayng mga linya o ridges sa ngipon niini, nga lahi sa hamis nga ngipon sa ubang matang sa dolphin.

Moabot kini og 2.8 metros ang gitas-on ug 160 kilos ang timbang. Bisan pa og gilista kini sa International Union for Conservation of Nature (IUCN) ubos sa Least Concern o wala pa giisip nga endangered sa tibuok kalibotan, gipanalipdan gihapon kini sa balaod sa Pilipinas batok sa ilegal nga pagdakop, pagpatay ug pagpasakit.

-- ADVERTISEMENT --

Lakip sa mga nag-unang hulga sa maong matang sa dolphin ang pagkasangit sa mga pukot sa panagat, basura sa kadagatan ug grabeng kasaba ilawom sa tubig nga mahimong makaapekto sa ilang paglihok ug pag-orient sa dagat.

Samtang, giawhag sa BFAR ang mga lokal nga pangagamhanan, mangingisda ug mga residente sa kabaybayonan nga magpadayon sa pagbantay sa Lingayen Gulf ug ireport dayon sa BFAR-1 ang posibleng pagsadsad sa mga hayop-dagat aron matubag kini sa labing dali nga panahon.