Gihangyo sa mga abogado sa mga biktima ang International Criminal Court (ICC) nga maminusan ang oras nga igahin sa usa ka saksi sa korte atol sa pagdungog sa kaso batok kang kanhi Presidente Rodrigo Duterte, tungod sa dakong kasakit nga iyang nasinati sa pagkamatay sa iyang mga anak.
Sa ilang mosyon nga gisumite kaniadtong Nobyembre 10,2026 misuporta ang mga legal representative sa mga biktima sa hangyo sa prosekusyon nga dawaton isip ebidensiya ang naunang narekord nga testimonya sa saksi nga giila lamang sa code name nga P-1303.
Sumala sa mga abogado, dakong emosyonal nga kabug-at alang sa saksi ang pagbalik sa mga panghitabo nga nalambigit sa kamatayon sa iyang mga anak. Gilauman nga pangutan-on gihapon siya sa kampo sa depensa ni Duterte atol sa cross-examination.
Matod sa mga abogado, makatabang ang paggamit sa iyang naunang testimonya aron malikayan ang balik-balik nga pagsaysay sa masakit nga mga kasinatian, samtang magpabilin ang kahigayonan sa depensa nga mangutana kaniya.
Gipunting usab nila nga kinahanglan maminusan ang oras nga ipahinungod sa saksi sa korte aron mapanalipdan ang iyang kahimtang sa pangisip ug malikayan ang dugang nga trauma.
Samtang, gitakdang magsugod sa Nobyembre 30 ang pagtaral kang FPRRD sa tulo ka ihap sa krimen batok sa katawhan.
Base sa opisyal nga datos sa gobyerno, mikabat sa labing menos 6,000 ang namatay atol sa kampanya batok sa ilegal nga droga. Apan sumala sa mga human rights watchdog ug prosekusyon sa ICC, gibanabanang mikabat sa 12,000 hangtod 30,000 ang mga namatay gikan sa 2016 hangtod 2019.
