Mipadayag ang Armed Forces of the Philippines (AFP) nga dili gustong makig-away sa China o bisan unsang nasod ang Pilipinas, kondili barogan lamang niini ang mga katungod ug interes sa nasud.
Kini ang tubag ni AFP Spokesperson for the West Philippine Sea Retired Rear Admiral Roy Vincent Trinidad human sa pahayag ni Vice President Sara Duterte sa Hong Kong nga angay likayan sa mga opisyal sa gobyerno ang pakig-away sa ubang nasod, lakip na ang China, taliwala sa nagpadayong tensiyon sa West Philippine Sea.
Matod ni Trinidad, gipanalipdan lamang sa Pilipinas ang mga katungod nga gihatag niini, lakip na ang maritime entitlements, soberanya ug mga katungod isip usa ka nasod.
Dugang pa niya, gisiguro lamang sa AFP ug Department of National Defense nga mapanunod sa sunod nga henerasyon sa mga Pilipino ang usa ka Pilipinas nga kompleto ang teritoryo ug gawasnon.
Gipunting usab ni Trinidad nga wala mangangkon ang Pilipinas og mga teritoryo nga dili iya, busa dili angay nga isipon nga kini ang nagpasiugda sa panagbangi.
Sa kasamtangan, giingon niya nga moral nga katungdanan sa matag Pilipino ang pagpanalipod sa nasudnong interes sa Pilipinas.
