Motestigo karong Miyerkules, Oktubre 11, 2026 ang corporate counsel sa GenCorp Industries, Inc. ug Metro City Chow Foods Corp. isip ikatulong saksi sa kampo sa depensa ni Vice President Sara Duterte sa ika-42 nga adlaw sa impeachment trial.
Gilauman nga ipresentar ni Atty. Suzette Balucanag-Punay ang General Information Sheets (GIS) ug Audited Financial Statements sa duha ka kompanya nga nalambigit sa Bise Presidente gikan sa 2022 hangtod 2025.
Orihinal nga gitakdang motestigo si Balucanag-Punay sa miaging hearing, apan nausab ang iskedyul sa iyang pagtistigo tungod sa iyang MRI appointment niadtong Lunes.
Kahinumdoman nga gikuwestiyon sa prosekusyon ang giingong wala maideklarar nga bahandi ni Duterte, lakip ang iyang pagbutang sa iyang Statement of Assets, Liabilities and Net Worth (SALN) nga usa siya sa mga incorporator sa maong duha ka kompanya, bisan wala ang iyang ngalan sa ilang GIS.
Human sa testimonya ni Balucanag-Punay, gilauman usab nga ipatawag sa depensa ang mga representante sa siyam ka bangko diin adunay mga account si Duterte ug ang iyang bana nga si Atty. Manases Carpio.
Lakip sa mga bangko ang BDO Unibank, Inc., Bank of the Philippine Islands, EastWest Bank, Landbank of the Philippines, Metropolitan Bank & Trust Company, PSBank, Security Bank, UnionBank Davao ug UnionBank Mandaluyong.
Pinaagi sa mga testimonya ug dokumentong ipresentar, gilauman nga tubagon sa kampo sa depensa ang mga isyu nga gipunting sa prosekusyon kalabot sa mga kompanya ug bank accounts nga nalambigit sa Bise Presidente.
