Nakabsan sa kinabuhi ang 7 ka indibidwal samtang kapin 100 ang nasamdan human magbangga ang duha ka tren sa siyudad sa Giza, Egypt, kaniadtong Domingo, Nobyembre 8, 2026.
Lakip sa mga namatay ang drayber sa usa sa mga tren, sumala sa Health Ministry sa nasud.
Nahitabo ang insidente dihang nagbangga ang duha ka tren nga gikan sa Giza ug Cairo padulong sa habagatang bahin sa nasud. Tungod sa kusog nga impact, nadiskaril ang pipila ka bagon ug nahulog sa embankment.
Mando ni Egyptian President Abdel Fattah el-Sisi sa mga otoridad nga imbestigahan ang insidente ug tukion kung kinsay angay panubagon.
Gipahimutang usab sa heightened alert ang mga duol nga ospital tungod sa pagdagsa sa mga pasyente. Gipasidan-an usab sa mga otoridad nga posibleng mosaka pa ang ihap sa mga namatay.
Mitabang usab ang Egyptian Red Crescent pinaagi sa paghatag og first aid ug psychological support sa mga biktima ug ilang pamilya.
Samtang, gisuspinde ang operasyon sa linya sa tren tali sa Giza ug Upper Egypt, gipanglimpiyohan ug gikuha ang mga bagon nga nakababag sa riles. Wala pa matino kung kanus-a kini mahuman.
Nagpaabot usab og pahasubo ang Saudi Arabia ug ang Embahada sa Turkey sa Egypt ngadto sa mga biktima ug ilang pamilya.
