Gipadeport na sa Bureau of Immigration (BI) ang unang grupo sa 115 ka Chinese nationals nga nadakpan sa dinagkong operasyon batok sa ilegal nga Philippine Offshore Gaming Operator (POGO) activities sa Zamboanga Sibugay ug Quezon City kaniadtong Oktubre 2026.
Sa kinatibuk-ang ihap, 62 ang nadakpan sa Zamboanga Sibugay samtang 53 ang nadakpan sa Quezon City. Gilangkuban ang grupo sa 107 ka lalaki ug 8 ka babaye.
Gipahigayon ang deportation human mopagawas og Summary Deportation Orders ang BI Board of Commissioners. Gisakay ang mga deportee sa usa ka chartered aircraft nga gitagana sa Chinese Embassy.
Lakip sa gipadeport ang usa ka pugante nga nadakpan sa Zamboanga Sibugay ug giingong gipangita sa mga awtoridad sa China tungod sa kasong may kalabotan sa pagtago sa kinitaan gikan sa ilegal nga kalihokan.
Ang pagpauli kanila gipahigayon kaniadtong Biyernes, Nobyembre 6,2026 pinaagi sa China Southern Airlines flight CZ5308 gikan sa Ninoy Aquino International Airport (NAIA) Terminal 3 padulong sa China.
Dugang pa, permanente na usab silang gilakip sa immigration blacklist sa Pilipinas aron dili na makasulod pag-usab sa nasud.
Subay sa rekord sa operasyon, 244 ka langyaw ang nadakpan sa dungan nga pagsulong sa mga lungsod sa Siay ug Alicia sa Zamboanga Sibugay kaniadtong Oktubre 2. Samtang, 76 ka langyaw ang nadakpan sa Barangay Socorro, Cubao, Quezon City niadtong Oktubre 12, diin giingong aktuwal silang nagpadagan og online investment scam.
Matod ni Immigration Commissioner Joel Anthony M. Viado, kabahin kini sa gipakusog nga kampanya sa gobyerno subay sa hingpit nga pagdili sa POGO sa nasud.
Gipasalig usab sa BI nga ipadayon nila, uban sa ubang ahensiya sa pagpatuman sa balaod, ang operasyon batok sa mga ilegal nga scam hub nga gipadagan sa mga langyaw. Ang nahibiling mga nadakpan sa maong mga operasyon sunod usab nga ipadeport human makompleto ang ilang mga dokumento.
