Gianunsiyo sa Estados Unidos (US) nga maghatag kini og reward money nga moabot sa $20 milyon alang sa bisan unsang impormasyon nga makatabang sa pagtudlo sa lokasyon diin gihimo sa Iran ang ilang mga armas nukleyar.
Lakip usab sa tanyag sa Rewards for Justice sa US State Department ang pagbalhin sa pinuy-anan sa mga tawo nga makahatag sa maong impormasyon.
Nagsunod kini sa naunang pahayag ni US President Donald Trump nga hingpit na nilang giguba ang mga nuclear facility sa Iran.
Tungod niini, nagtukod ang US Central Command og Task Force Iron Gate nga maglihok sa Tampa, Florida.
Nagtuo usab ang US Central Command nga ang ilang gipahigayong naval blockade maoy nakababag sa pagsulay sa Iran nga makasulod og mga materyales nga gamiton sa paghimo og nuclear weapons.
Matod sa US Central Command, gihimo nila ang pagpatanyag og reward money tungod sa kapakyasan sa Iran sa pagtuman sa mga lagda nga gipatuman sa International Atomic Energy Agency (IAEA).
