Patay ang unom ka tawo samtang kinse ang nasamdan human sa pagpamusil sa Krakow City, Poland kaniadtong Nobyembre 7, 2026.
Sumala sa mga awtoridad, usa ka 25-anyos nga lalaki ug nagsul-o og camouflage ang suspek ug kalit nga namusil gamit ang military-grade nga armas (semi-automatic rifle) sa Main Market Square sa maong siyudad.
Upat ka babaye ug duha ka lalaki ang namatay, lakip ang tulo ka Polish national ug usa ka lungsoranon sa United Kingdom. Lakip usab sa mga nasamdan ang duha ka pulis, diin usa kanila ang anaa sa kritikal nga kahimtang.
Gihulagway ni Polish Prime Minister Donald Tusk ang insidente isip usa ka akto sa terorismo. Matod usab ni Interior Minister Marcin Kierwiński, nagpakita sa inisyal nga imbestigasyon nga posibleng naimpluwensyahan sa far-right o ultra-nasyonalistang ideolohiya ang suspek.
Gawas sa mga biktima sa plaza, nakaplagan usab sa mga pulis ang tulo ka patayng lawas sa balay sa suspek sa Ostrowiec Świętokrzyski. Ang mga cadaver, gituohang iyang mga ginikanan ug igsuong babaye nga posibleng una niyang gipatay sa wala pa moadto sa Krakow.
Nasamdan ang suspek human makigpinusilay sa mga pulis ug subling nadakpan. Narekober usab sa iyang sakyanan ang mga armas ug bala. Anaa kini karon sa ospital ug kritikal ang kahimtang human napusilan sa usa sa mga pulis.
Tungod sa insidente, gipakusogan sa mga awtoridad ang seguridad ug pagpatrolya sa Warsaw. Nagdeklara usab og mga adlaw sa pagbangotan ang kagamhanan samtang nagpadayon ang imbestigasyon aron matino ang tibuok motibo ug mga kahimtang sa pagpamusil.
