Gisuspenso sa Office of the Ombudsman sulod sa unom ka bulan nga walay sweldo ang lima ka project engineers sa DPWH Bulacan First District Engineering Office tungod sa giimbestigahang P188.8 milyones nga ghost flood control projects sa Baliuag, Bulacan.
Lakip sa mga gisuspenso sila Irene D. Ontingco, Kevin A. Geronimo, John Michael E. Ramos, Bernardo P. Villafuerte ug Michelle C. Cruz.Nag-atubang sila og administratibong kaso nga grave misconduct, serious dishonesty ug gross neglect of duty kalabot sa tulo ka proyekto sa reinforced concrete slope revetments niadtong 2024.
Base sa imbestigasyon, giingong adunay pagpalsipikar sa mga dokumento sa inspeksyon, pagdawat ug pagbayad aron magpakita nga tinuod ug nahuman ang mga proyekto bisan giingong wala kini aktuwal nga natukod.
Matod sa Ombudsman, gikinahanglan ang preventive suspension tungod sa lig-on nga ebidensya ug aron malikayan ang posibleng pag-impluwensya sa mga saksi samtang nagpadayon ang imbestigasyon.
Wala naapil sa suspensyon ang kanhing Officer-in-Charge District Engineer Brice Ericson D. Hernandez ug kanhing Assistant District Engineer Jaypee D. Mendoza tungod kay dili na sila aktibo sa serbisyo sa gobyerno.
