Nagtinguha ang dugang pang halos 100 ka indibidwal nga ilhon isip mga biktima sa kampanya batok droga nga gipahigayon atol sa administrasyon ni kanhi Pangulong Rodrigo Duterte, kapin usa ka bulan sa dili pa magsugod ang iyang husay sa International Criminal Court (ICC) kalabot sa kasong crimes against humanity.
Sa dokumentong gisumite sa ICC Registry kaniadtong Oktubre 28,2026 gipahibalo niini sa Trial Chamber III nga nasusi na ang 46 ka aplikasyon nga gilangkuban sa 96 ka indibidwal pinaagi sa Victims Participation and Reparations Section.
Giklasipikar ang pinakabag-ong grupo sa mga aplikante isip “Group A,” pinasikad sa sistema nga gigamit sa ICC aron masuta kung kinsa ang kwalipikadong moapil isip biktima sa kaso.
Ubos sa maong sistema, ang Group A nagpasabot sa mga aplikante nga klarong kwalipikado isip mga biktima; ang Group B mao ang mga dili kwalipikado; samtang ang Group C naglangkob sa mga aplikante nga wala pa matino ang ilang kwalipikasyon.
Sa laing dokumentong gisumite usab kaniadtong Oktubre 28 ug gipahibalo sa publiko niadtong Huwebes sa gabii, upat pa ka aplikasyon ang gilakip sa Group C.
Giila isip confidential ang tanang aplikasyon ug ang ICC Registry lamang, isip administratibong departamento sa korte, ang adunay access niini.
Kung pormal nang dawaton sa kaso ang bag-ong mga aplikante, idugang sila sa 539 ka indibidwal nga giila nang mga biktima atol sa pre-trial stage ug magpadayon ang ilang pag-ila sa panahon sa paghusay.
Gikatakdang sugdan sa Nobyembre 30, 2026 sa ICC ang pagtaral batok kang Duterte.
