Patay ang tulo ka tawo ug angol ang lima pa human nahugno ang bahin sa dakong pormasyon sa bato nga gikan sa bulkan sa Cappadocia, Turkey niadtong Huwebes, Oktubre 29.
Ang maong pormasyon sa bato, nga gitawag og fairy chimney, nahugno duol sa usa ka parkinganan sa rehiyon sa Göreme, Cappadocia.
Matod ni Gobernador Huseyin Kok, posibleng tungod sa kusog nga pag-ulan ang pagkahugno sa maong pormasyon sa bato.
Padayon ang pagpangita sa mga rescue team sa ubang mga tawo nga posibleng naipit ilalom sa mga nangahugno nga bato.
Dugang ni Kok, duha sa mga namatay ang mga lungsoranon sa Turkey, apan wala siya maghatag og dugang detalye bahin sa ikatulong biktima.
Samtang, gipahibalo ni Turkish Justice Minister Akin Gurlek nga nagpadayon na ang imbestigasyon sa maong insidente.
Ang Cappadocia, nga nahimutang sa sentral nga bahin sa Turkey, usa ka UNESCO World Heritage Site ug iladong destinasyon sa mga turista tungod sa talagsaon nga mga pormasyon sa bato niini.
