Gisumite na sa Judicial and Bar Council (JBC) ngadto kang Pangulong Ferdinand “Bongbong” Marcos Jr. ang listahan sa mga nominado alang sa posisyon nga Punong Mahistrado sa Korte Suprema.
Gawas niini, gipadala na usab karong adlawa sa JBC ngadto sa presidente ang mga shortlist sa mga nominado alang sa posisyon nga Associate Justice sa maong korte.
Kini may kalabotan sa nagkaduol nga pagretiro ni Supreme Court Chief Justice Alexander Gesmundo sa Nobyembre 6, ug Associate Justice Amy Lazaro-Javier sa Nobyembre 16.
Lakip sa mga nominado alang sa posisyon nga Chief Justice sila Supreme Court Associate Justice Marvic M.V.F. Leonen, Associate Justices Alfredo Caguioa, Rodil Zalameda, Japar Dimaampao ug Jose Midas Marquez.
Duha sa lima ka Senior Associate Justices sa Korte Suprema, nga sila Justice Ramon Hernando ug Henri Jean Inting, ang mibawi sa ilang pagdawat sa nominasyon.
Sa shortlist alang sa posisyon nga Associate Justice, lakip sa mga nominado si Court of Appeals Justice Ramon Bato Jr., Solicitor General Darlene Berberabe, Commission on Audit Chairperson Gamaliel Cordoba ug uban pa.
Ubos sa Konstitusyon, gimanduan ang JBC sa pagrekomendar og mga nominado ngadto sa presidente alang sa mga bakanteng posisyon sa hudikatura ug sa Office of the Ombudsman.
