Personal nang desisyon ni Senator Ronald “Bato” Dela Rosa kung boluntaryo ba siyang mosurender sa dili pa matapos ang deadline sa gobyerno karong Biyernes,Oktubre 30, 2026 sumala sa iyang abogado nga si Atty. Israelito Torreon.
Gipasabot ni Torreon nga nasayod na ang senador sa posibleng mga sangpotanan sa iyang desisyon. Kataposan na silang nagkaistorya ni Dela Rosa kaniadtong Mayo, sa pagpakita niini sa Senado.
Samtang, nagpasa ang legal team ni Dela Rosa og bag-ong manifestation sa Korte Suprema aron hangyoon nga susihon pag-usab ang naunang pagbalibad sa iyang hangyo alang sa temporary restraining order o TRO batok sa posibleng pagdakop kaniya.
Lakip sa mga bag-ong panghitabo nga gipresentar sa legal team ang pag-anunsyo sa ₱50 milyong reward money alang sa impormasyon nga mosangpot sa pagkadakop sa senador. Gikuwestiyon ni Torreon ang legal nga basihan sa maong tanyag ug sa pagdeklarar kang Dela Rosa nga wanted ug armed and dangerous. Matod niya, walay warrant of arrest nga gipagawas sa korte sa Pilipinas batok sa iyang kliyente ug posibleng mameligro ang kinabuhi niini.
Sa laing bahin, naglusad ang Philippine National Police (PNP) og mga hotline aron makadawat og impormasyon gikan sa publiko nga makatabang sa pagpangita ug pagdakop kang Dela Rosa.
Sumala kang PCol. Allen Rae Co, hepe sa Public Information Office (PIO) sa PNP, padayon ang pagsikop sa kapulisan sa senador. Apan, mas maayo kung boluntaryo na lamang kining mosurender aron malikayan ang posibleng madugong engkuwentro.
Nagpasidaan usab si Co kabahin sa mga prank caller nga posibleng pasakaan og kaso kung maghatag og bakak nga impormasyon o tinuyong magsamok sa operasyon.
Nagpasalamat usab si Co sa Armed Forces of the Philippines (AFP) sa posibleng paghatag og dugang puwersa aron makatabang sa pagpangita sa senador. Samtang, gipasiguro niya nga aduna silay igong puwersa aron ipadayon ang pagpangita sa senador.
