-- ADVERTISEMENT --
- Gisusi sa Department of Energy (DOE) ang pagpalit ug pagtipig og reserbang krudo sa ubang nasud aron masulbad ang kakulang sa kapasidad sa pagtipig og lana sa Pilipinas, isip pagpangandam sa El Niño ug sa nagpadayong tensiyon sa Middle East.
- Matod ni Energy Secretary Sharon Garin, imbis nga mopalit dayon og daghang produktong petrolyo ug mogasto og dako nga pondo, mogamit ang nasud sa “ticketing system” diin mobayad lamang og reservation fee nga mokabat sa ₱50 milyones.
- Gipasabot ni Garin nga pinaagi niini nga sistema, diin ang bayad magdepende sa gidaghanon sa mga bariles matag tuig, makapakuha ang nasud sa gitipig nga suplay sa petrolyo ug mapasugo kini nga ipadala sa Pilipinas bisan kanus-a gikinahanglan.
- May kalabotan niini, nagplano usab ang gobyerno sa pagpatuman sa ubang mga lakang sa sektor sa enerhiya, lakip ang pagbutang og mga power barge isip mas barato ug epektibong paagi aron dali nga makakuha og suplay sa kuryente kon adunay mahitabo nga problema.
- Padayon usab ang mga simulation sa Visayas kauban ang National Grid Corporation of the Philippines ug mga kooperatiba aron masusi ang posibleng epekto niini sa presyo sa kuryente sa dili pa kini hingpit nga aprobahan.
- Samtang, gilauman usab ang pag-ubos sa presyo sa mga produktong petrolyo, ilabi na sa gasolina nga adunay maximum ug premium rates.
- Nakatabang usab ang pagbarato sa bayad sa pagbiyahe ug pagdala sa lana aron mas lig-on ang gipaabot nga pag-adjust sa presyo ug malikayan nga dali kining mabawi.
- Matod ni Oil Industry Management Bureau Director Rino Abad, bisan adunay gamay nga epekto ang pagsaka sa exchange rate o palitan sa piso, dili gihapon kini dako og epekto sa kinatibuk-ang presyo sa mga produktong petrolyo.
